Blog Archives

A Crash Course in Old Nick’s Dealings

You might not be familiar with some of the terminologies used if you haven’t read the first and the second editions of Crash Course. Try to enjoy. And subscribe. Tagging is a royal pain.
********************************************
********************************************

Devil dey work o. Who tell you say devil no dey work dey lie. Devil dey work pass ashewo wey get target.

I been dey house wen Napodia papa wan use cutlass do me like mallam suya.
“Open dis door! Make I see d tin wey you use give Napo belle! Wen I finish wit you, you go see woman run.”
Small time, him halla come turn to cry.
“Ooooh. My Napodia. My innocent Napodia!”
Innocent ko, flourescent ni. Napodia wey like Patrick pass pure water. I wish say I been snap picture wen Napodia dey show me skill wey she see for blu feem. Abi u tink say na ordinary eye dey turn Crash Course to Credit? No be only innocent. Small time, Napo papa vexation return.
“Foolish boy. Come out now!”
My guy wan break dis door sha.
I remember d oyinbo wey Pastor been blow on Sunday. Wetin Crashito dey find for church? You dey mad? Where I wan see offering tiff before? “When God closes a door, he opens a window!”
I look my burglary proof again. Omo dis window lock die. I come hear noise inside ceiling. Idea. E no reach two minutes wey I use remove ceiling board, enter roof begin dey run. As I dey up dey run, I see space for down where anoda ceiling board don remove. I tink say na inside person room I dey go land. As I jump down, I see myself for d corridor of our face-me-I-slap-you.
Also, one man (wey ugly pass gorilla wey smell crase man armpit) carry cutlass dey wait me. “You must marry my Napodia or else I will feed you to wild animals.” I no tink. I just look him cutlass answer, “Sir, which day make I come pay dowry?”
Devil dey work.

I dey do construction work. My company dey send for us anytime wey work dey. So if I no dey house or my friend place, I dey site. One day, I dey site for Lekki. We dey build one big house. Dat day my oga say I no go carry load. Na only to supervise one small tin so I wear beta cloth come dat day. I dey work my own jeje when horn sound outside gate. I look but d gateman no dey.
“Heyss! Ol boy! Oga pikin don land. Go open gate.” Na one of d boys wey I dey supervise dey open him mama gutter dey follow me yan. No fear. Normally we dey follow work sha. So no yawa. And I reason say na me neat pass so I first threaten him life before I go open d gate. One fine, clean motor enter d yard. D motor park, and oga pikin come out. I tink say na man. Omo na babe. Finest babe.
Money good o.
See as d babe skin fresh. Goddddd! Her face too fine and her body make sense. She get front but back no too full. Like 504. And na small pikin o. She no fit pass 22, 23. I senior am for sure but I no kno when I greet am.
“Aunty good afternoon.” see wetin bobbi dey cause.
“Hello, good afternoon. How are you?”
“I dey fine ma,”
“There are some things in the back seat. Please help me carry them.”

Make I explain give una small. This work no be new house. Na renovate we dey renovate. Dem break one side but the people wey get house dey live another side inside the same compound. I carry some small small things then follow madam go where she dey go. As we dey pass, some of the boys dem wey dey work begin shout give me.
“Crashito, dis one wey you follow madam for back, no too near am o. You know say you dey smell,”
“Yes na,” I answer d guy, “na me do mistake borrow your papa perfume!” D babe troway face like say she no dey hear but I see am dey laugh small small.
“Crash Cos!” Another idiot. All these yeye boys can sabi misbehave once dem see babe. “Why you tiff my shirt wear come work na?”
“No vex. Your sister open your wardrobe dash me after I give am Patrick chop!” Me sef sabi shout. Boys dem just dey laugh as we waka pass. Madam just face front. We waka reach back of their house na im she open their back door from kitchen side. She show me where to drop d tins dem. After I drop them, I see her face. She dey smile.
“What is your name?”
“Crash Cos,” as I dey answer, she dey bust laugh.
“I was afraid of that,” her foné no be here. I no too dey hear am sef.
“My name is Colette, by the way,” I shock.
“Sorry ma, you be D’banj pikin?” She bust more laugh.
“Why do I always get that? It’s Colette not freaking ‘cocolet,'”
“Oookay. Co…lette.”
“Yes. Colette. Now could you do me a favour?”
“Like wetin?”
“I’m an English major doing my thesis and I’d like to ask you some questions about broken English.” D only tin wey I hear na ‘question’, ‘broken’ and ‘English’. But trust mumu wey I be. I just answer.
“Yes ma,” next tin wey I know, d babe collect my number come tell she say she go buzz me. Jesu mi. My life don beta na. Levels don change. Dis kain babe collect my number, na happiness and joy and hammering remain na. As I wan commot go return my work, she come ask me JAMB question.
“So I have to ask. What’s does it mean when you say ‘Patrick?'”
Wallahi, I know say baba God dey my side, but devil dey work.

Devil dey work but sometimes, e be like say God dey work too. My phone ring the next day and na Napo.
“Hello. Napo, na wetin?”
“Hello. Crash Cos, na so u dey ansa your future wife?”
“Make thunder use old crayfish solder dat ya mouth. Who be your husband?”
“Wait first. Who dey pursue you?” D only tin be say devil dey use dem family. If not, Napo voice sexy die. Temptation.
“Pursue? Dem no tell you say ya popsy wan take my bloqos do dog food?” D idiot start to laugh. Dem don swear for dis one?
“Crash Cos, no vex. If na your daughter, abi our daughter, you sef no go vex?”
“Which one be our daughter? Napodia, you follow ojuju dance for dream?” I don dey vex. Which kain nonsense?
“Crash Cos relax. My mama don follow my papa talk. Me and you no go marry. Money you no get. And no be say you too fine. Plus you no kuku get respect for elders.”
To start d matter, I happy say Napo dem people don free me. Na d insult wey she follow join for back na im dey pain me.
“Napo, who no fine? Me and you who fine pass. Na only yansh you get o. You wey do face like burnt offering,”
“Oya e don do, e don do for you Crash Cos,” she sef don dey vex. Make she see as e be to collect insult na. Idiot.
“No be d tin wey make me call you sef. No dey use my credit curse me,”
“I don hear. Wetin make you call me?”
“I tell you say my mama follow my papa talk. But before we do anything about dis pikin, dem say make you come house make we follow talk.” Which house? To go die? I answer Napo straight.
“Ah. Una don see cheap market abi? E be like say your papa don see buyer for d dog food atink?”
“No o. No be so. My popsy don calm down. True talk. Just come. Me sef I know where him dey keep d cutlass. I go hide am. Trust me.” Napo voice come sexy again.
“Which day make I come?”
“Next week Tuesday. Around 6 when you go don close work,” I tink am small.
“Okay. I go try. But I no go wear shoe come o. Na pam slippers. In case I need run,” Napo start laugh again.
“Okay, I don hear. Bye bye.” She cut phone.

On Tuesday, I jam Colette for work again. That day, she come where we dey work come find me. All those boys come begin jealous me.
“Crashito, madam dey find you,” I do go meet am where she stand.
“So I was thinking we could do that interview today,” Interview? So all d grammar wey she dey blow since na for interview? Well, I no too complain. She fit be d future Mrs. Crashito. Baba God abeg.
“Which time?” I gats tell am say I get waka for dem Napo house but I no tell am wetin d waka dey about o. I sha tell am say we go meet after I finish for dem Napo side. She come call d name of one restaurant say make we meet there. Before she go, she press 2k inside my hand say make I use am join taxi.

For evening, I surprise for Napo dem house o. Dem papa don mellow. Na d babe mama dey look me like say I carry dustbin for head. Dem tori no too plenty. Story no too long. Dem just wan know my face and dem tell me say na me go drop money for anytin wey Napo need do for hospital. I just dey remember Napo papa cutlass dey answer “yes sir, yes ma.” When I reason say yans don finish, I stand up say make I dey go. Na Napo voice I come hear:

“Crash Cos, you must chop na,” Chopology. Awoof dey cut spirit for Orile o. My guy Kajeta, na awoof finish am for area. Im tiff for the place wey im dey work houseboy before. D people know say e tiff. D next day wen im come, dem mix juju and cement give am chop inside ogbono. My guy chop am finish dey happy. Since dem sack am, rumour be say na only Julius Berger gree employ am.

Because im dey helep dem shit block.
Devil dey work.

But last week, wen I dey ‘collect’ church offering, I hear dem pastor dey preach.
“The devil is liar!!!” Na so church shout “AMEN!”
“No weapon fashioned against you shall prosper!” As I dey commot d money, na so I dey use style dey shout “Amen!” Baba, I believe.
Juju no dey kill herbalist.
“Bring am make I chop,”
Omo dem give rice and beans chop. No be say d food no sweet. E sweet die. D yawa be say I suppose see Colette after I commot here and na egg and bread I chop since morning. D food sweet. Wella. I chop am one time clean mouth. Small time, I move.

I reach d place wey Colette say make I jam am. One fresh joint for VI. D people get restaurant inside come get joint outside for open air. She been don dey wait me sef. Chai.
“Hey Crash Cos, why are you sweating?”
“Nothing ma,” Omo na something o. Wen I dey inside bus dey come, na im my belle begin turn. I just dey hold myself since.
“Would you like something to eat?”
“No ma,” dis one want make I die? I just dey under breeze dey sweat. E be like say she tink say na fear wey dey make me sweat.
My hand been dey on top table. I no know wetin push d babe: she just carry her hand put on top my own.
“Relax,” omo as she talk dat tin, see as joy full my heart. I no know wen laugh catch me. And na dat time yawa come gas. Well, na me actually commot gas but d smell na yawa. And d breeze dey move well. Chineke God of Orile criminals. Which kain mature mess be dis?
“What died in here? Crash Course, did you fart?” D tin smell na instant.
I swear, cry dey my eye as I dey confess. I no fit lie dat kain lie: everybody know say I no get weight, “Aunty I no fat. Na mess I mess.”
“Oh my God!”
Since she run go dat day, she never call me again.

Devil dey work.

Advertisements

A Crash Course in Burglary Proof

Wow. 9 months since I first penned Crash Course. I’m awful at this. And yes, this is also in pidgin. And this is also raunchy
*******************************************************************************************************************************
*******************************************************************************************************************************

I like my landlord. Na correct guy. Him build dis im house well well. You don see ‘Face Me I Woze You’ wey carry burglary proof for window before? Omo dem fit dey but na Island yard dey get all dat one. You nor fit see am for dis we Orile. For me to pack out of dis yard go hard. Sotey landlord build toilet reach two for backyard.  Anyway sha, dat evening I just baff dey fresh dey expect person. Me and Napodia been get appointment. She suppose come yard come see Patrick. I know say una don begin dey tink who be “Patrick”. If you remove the ‘at’ inside im name, you go know say Patrick na our best friend for area. We dey pamper am and everything wey we dey reason na to benefit Patrick.

U don kana am?

My mainest man na one boy wey dem dey call Credit. Him dey sell chemist for area. After I go gist una why we call am dat name. Me and d idiot get appointment so I reason say make I call am warn him papa spirit not to near my house today as per say because babe dey come.

“Credit, how far now?”

“Crashito! How paroles na?”

“I dey. Which levels?”

“Omo, I go soon begin come your side o. Make I just free small for shop. Boys broke die. Shebi if I come you drop for me ba?” Dis fool dey always beg money but no be im make I give am dat name sha.

“Drop ke? I resemble your mama bobby?”

“Guy no dey cuss my mumsy bobby o!”

“Why I no go cuss am? Una dey buy broom? No be d tin wey una dey use sweep yard?”

“You don start o, you don start! Na wetin na?” I smile where I dey. Any small yabis dey can sabi pain Credit.

“Guy calm down. No vex. I say make I call you tell you say make you no show again o.”

“Ah ah. Make I no show? Why?”

“Napodia dey come,”

“Ahhhhhh! My chairman!” Nothing dey sweet boys pass to hear say woman dey come find man. Credit just continue to dey hail.

“Guy, she go visit Patrick side?” Which kain stupid question dis boy dey ask me sef?
“Na because of am wey she dey come na,” I no dey kuku fall hand.

“Ah. Sure boy. Tidy am well o.”

“Guy, my name no be Credit na. I be original Crash Cos!” Okay, make I tell una why we dey call am Credit. Credit na d shorten of “Hundred Naira Credit”. And I give am dat name because, according to him girlfriend, our guy “no dey tey before him finish.”

****************************************************************

One hour later, Napo dey my room and I wan remove her blouse.

“Crash Cos wait,” Oooooh god! Which kain wahala be dis? Why dis babe dey slow my movement?

“Wait say wetin happen?” I don dey vex where I dey sef,

“I never do dis kain tin before.” Napo come dey hide face for me.

“Which kain tin you never do before?” Napo come shame for face as she use hand point my ‘extension cable’. I shock.

“Napo, dem never take Patrick slap you before?” Napo shake head.

I don die for Lagos!

“Jisos! So you dey try tell me say as your yansh big like cinema television so, you never see Patrick?”

“Crash Course, I never see…”

“Why? Why? Patrick is good na! You must try to dey see am from time to time. Ehn. Napo give me one good reason why you never visit Patrick at this age. You nor dey see your mates? Crash Course no dey tear label o! No be me dey open shop!”

Omo na lie o. Dat day I open shop by force by force. Patrick cannot live by garage alone… e must to dey visit sardine container once once na.

When I dey with Jolomi, I fit control myself. But if Napo na sardine container, Jolomi na airport. I no know when I turn to Credit.

“Ahn ahn. Na wetin? Crash Course, you don finish?”

My eye don roll go back. E don sweet me die.  I just manage get myself abuse d girl. “Common sharrap dia!”

 

After my eye don clear, I realize say problem dey. I forget to wear Patrick im shower cap. I no know why na me dis kain tin dey always do. I tell Napo make she relax for house. I come go meet Credit where him dey sell chemist. When I reach, customer been plenty dia. I just waka cross the counter because Credit na my guy. I first greet am so dat dose people no go know say I come buy market. As I greet Credit finish, d idiot rush ask me.

“Guy, how d waka go na?”

“Waka go well but I need sontin,” I begin talk small small. “Wetin be d name of dat drug wey dem dey use commot belle?”

“Which one? Postinor?” The volume wey d bagger use call d name vex me. Na so I near am come pinch am for belle codedly.

“You want make everybody for area know say Crash Cos carry woman?” Credit squeeze face as d tin pain am wella.

“Na im make you wan wound me?” Him don get sense begin talk small small.

“Just give me d melecine joor.” Make dis guy no make me vex o.

“E don finish.” Him dey answer me as him dey waka go pick another drug wey customer ask for.

“You say wetin?” I nearly piss for body.

“E don finish. You no know say na ashewo girls full this area? Orile girls dey drink Postinor like Vitamin C.”

“Kaiiii! How I go do na?”

“I get another one.”

“Wetin b d name?” Credit sell d market wey e dey sell finish come face me.

“Impostinor.”

“Which one be dat?”

“Na like Postinor but na different people make am.”

“E go work so?”

“E supoose work na. Trust your boy.”

I been trust the fool. My mind be say e go work.

 

**************************************************************************

 

But after like one month na im Kajeta call me dat yeye call:

“Hello, guy how far na?”

“Guuuuy! Yawa don gaaassssss o!”

“Ahn ahn. Wetin happen again?”

“Napodia don get belle!”

“Napo-wetin?”

My prayer be say na Jolomi way wey dis one go go. Maybe she no really get belle or na another bobo plant am. But Kajeta never drop phone  finish when my phone begin ring again.

 

“Oooooh! Kajeta na wetin again?”

“No oh. Na Credit.”

“Ah. Credit. Dis one wey you dey breathe fast fast, hope say you dey okay…”

“Ol boy no vex ehn, but somebody dey carry knife come find you for house.”

“Shooo! Who be dat?”
“I swear na force him force me to give am your address.”

“Oh. So na you give am my address?”

“How I for do na? Him been nearly make me swallow the knife first!”

“Ahn ahn… why dis person dey find me?”

“Hin dey find you kill because him say you spoil him life!”

“Whose life I spoil na? Who be dis person?” I never talk dat one finish when I hear wetin be like crase person outside my dommot.

GBA! GBA! GBA!

“OPEN DIS DOOR BEFORE I BREAK AM!!! OPEN DIS DOOR!!!!”

“Kajeta who be d person?!” Fear don dey catch me already. D person outside still dey shout:

“OPEN DIS DOOR!!! I WILL KILL YOU TODAY!!! BASTARD!” GBA! GBA! GBA! GBA! GBA!

Credit come answer me with bomb: “Crashito, na Napodia popsy o.”

Fuckuuuup…

As I dey hear the noise, I begin reason my next movement. Omo, na to fly window sure pass. I open curtain come jam thick thick burglary-proof…

Na god go punish my landlord!

Crash Course

If pidgin is gonna be a problem, close this page now. It’s kinda graphic but it had to be. Loosely based on true events. Errors in characters’ grammar are deliberate.

***                        ***                        ***                        ***                        ***                        ***

“I no go huzzle (till infinity) but I go bubble (till infinity)…”

I pick d phone. Wizboyy na my man. I no go change my ringing tone till I buy my own jeep. Or till Showkey Baba release song again; anyone wey sha happen first.

“Hello, omo how far na?” Na my guy Kajeta been dey call.

“Guuuuy! Yawa don gas o!”

“Ahn ahn. Wetin happen?”

“Jolomi don get belle oh!”

“Jolo-wetin?”

“Jolomi! And she dey tell men say na you give am d belle.”

“Give wetin? I never see im pant na! I never kiss am sef. How I wan take pregnant am?” Make I tell una true: I been don see her pant sha. Smelling pant for dat matter. But I no wan enter yawa abeg. Which kain wahala be dis?

“Omo, d babe dey tell men for area say na you give am sha. Make you know wetin you go do o. Ehen.”

“No mind d babe joo. She dey find who go buy baby food for am. Notin do u my guy. Tank you.”

“Ok na.” I cut phone. Kajeta na my person but you no fit trust anybody for Orile-Iganmu for dis kain matter. Everybody dey find your gist for here. Any fuck up na for your head.

“Hello, Jolomi!”

“Hey Big Daddy! How are you doing?”

“Jolomi! Who be your Daddy? Betta go ask ya Mama o. Na me you dey speak English for? If I sound you from here ehn…” I jus dey para. See dis babe o!

Ahn ahn…. Honey bunsh, why are you angry?” Jolomi still dey follow me blow grammar.

“Who be your… in fact, I no get your power today. I just call you to warn you: no dey teh people say na me give you belle o! I go wound you for dis Iganmu o!”

“But dat day, you no wear condom na,”

“Oh you don learn pidgin sharp sharp abi? Which day abeg?”

“Ifeanyi, we had sex on the twenty-six na!” because d babe know me from small na im make she dey try me abi?

“Dis one wey you dey call me Ifeanyi. My name no be Ifeanyi again. My name na Crash Cos. CRASH-COS!”

*******************************************************************

Actually sha, d name wey my mama give me na Ifeanyi but I don stop to answer dat name since. Na one Oyibo mam give me d name when I small. Dat tori long sha. One day I fit gist una. I sha no dey gree make anybody call me Ifeanyi again. Unless my momsy or my broda.  Jolomi liver no dey finish.

Ah. Jolomi.

Jolomi na babe wey I don know tey tey. All we grow for d same area. We even go d same primary school sef. I suppose senior Jolomi like two years sha but I no sure. E get when I hear say she follow her aunty go stay for Satellite Town. But around October last year, she come back. I suspect say dat her aunty na farmer because Jolomi come resemble person wey dey chop fertilizer. D babe just full ground. Her balcony and her BQ na grade one! We don jam once or twice for area but she no dey gree hear my yans. I don try tire but she no dey gree.

Until 26th December; when we do our Christmas carnival.

Dat day I don drink enough stout. I dey dance like crase person. I come see d babe for one corner. She sef dey dance. She sef don high. I reach dia na so I begin grove d babe. I grove am for dance floor sotey she sef KNOW say person grove am. And na rough dancingo. You know as we dey do for area na. Na so she give me back come dey feel my oil pipeline. She turn face me.

“Ifeanyi, where your house dey?” Omo, dat day I no even send say she call me Ifeanyi.

“My house dey for the next street.” Jolomi just draw me for hand dey carry me go my own house.

Oh boy! Jolomi sabi d tin! D girl dey wine waist die. Me sef I surprise o! No wonder she dey do shakara. D babe kpekus carry anointing! See waya! I nearly trowey on time but I too smart for dat one. I form stoppage sharply.

“Jolomi wait abeg, wait…” I gats get myself for one or two minutes.

“Oooh,” she begin complain, “Ifeanyi, e mean say you no get power?”

“Sharrap dia! Jolomi I wan ask you one question.”

“What is it?” d idiot come dey eye me,

“You be ashawo?”

“Which kain stupid question be dat? You see me for ashawo house before?”

“No na but see as you dey move. Na ashawo movement be dat na.”

“Oh. How you take know as ashewo dey move? Abi you sef don carry ashi before?” I clear my throat. For  my mind I first beg God to forgive me before I lie:

“No na. Never. Tufia. I don pass dat level na.”

“Continue dis tin before I lose interest joo,” by then, I don steady again. After like twenty minutes, I finish. As I dey finish, my eye dey clear…

And as my eye dey clear na im I realize say I no even wear raincoat.

********************************************************************

As a responsible somebody wey no sabi him papa, I no wan do Jolomi and my pikin as my Papa take do me. I make up my mind say I go help d babe as my hand reach. Even before she born.

“Hello,”

“Hey. Ifeanyi… How na?” Dis girl no dey gree fear god.

“Atink I don tell you tire. My name no be Ifeanyi. Make you dey call me Crash-Cos.”

“No be Ifeanyi be d name wey your mama give you?”

“You be my mama?” She finally keep quiet. I begin yan wetin I carry for mind.

“I say make I help you handle some tins as e be say you carry my pikin for dat ya big belle. E get anytin wey you need?”

“Hmmm…” She begin form tinkin. Shakara no go kill Jolomi.

“I dey go do my ultrasand tomorrow,”

“Wetin be dat?” Jolomi and dis her yeye grammar sef. No be like say she finish primary six. She dey fail pass Danfo fan-belt. Na too much film dey deceive am.

“Na just scanning to see weda my pikin dey alright.”

“How much you need?”

“Like two-five sha.”

“I fit follow you come?”

“If you like.” If I like. Mssstchew.

Jolomi na small tif sha because e come be say d scan cost one-five. She still collect d two-five from me sha. She say d 1k na ‘pregnancy allowance.’ Orile armed robber.

Na so we dey inside d hospital. Doctor rub one kain tin on top Jolomi belle and den she carry anoda tin put on top am. Picture come dey show for one small screen.

“Oga na your pikin be dat o.” I squeeze eye begin look like say I understand wetin dey show for d screen. To god I no see anytin. D doctor sef dey look screen, dey look d belle come dey talk.

“Your baby is quite healthy.” I hear “healthy” I happy small. Doctor continue to dey yan.

“From what I can see here, your baby is about four months old and doing well,” my blood just cold

“Doctor, say wetin? You sure?”

“Very sure. Maybe even five months but definitely at least four.”

“Four mont? Jolomi dis na February na!”

“Ehen? So?” Jolomi dey look me like say I no well.

“So wetin? No be December 26 me and you do paroles? How come pikin don reach four months? Abi na my ciga give you belle?” Jolomi come dey understand wetin don happen. Shame catch am immediately.

“I don dey warn you. I don dey warn you, Jolomi. Repent and stop workin ashewo. I don dey warn you.” Jolomi no fit answer. She just confuse. She come dey look d doctor like say na him betray Jesus. If to say I sabi read bible, I for show am where dem keep Judas. She come begin count finger. I just dey look am. Abi she don crase finally finally?

“Okaaaaaay. E be like say na Moruf get am sha. I no calculate well be dat.” I no know wetin to do Jolomi. Even to insult am tire me.

“Jolomi please give your life to Christ. I don tell you.” I no even wait again sef. Na run I run commot for hospital. I later regret because I for demand my two-five from dat mumu girl.

But I happy gaan! For evening, I just arrange myself dey drink, dey dotti eye for Iya Ibeji joint for Opeleyeru street. One woman dey sell drink for Onyah but her shop near one white garment church. I no fit dey look Jesus picture dey manya. Anyway, d shepe been make sense that day. Like say Iya Ibeji know say beta tin happen for my side.

I sha dey my own jejely when Napodia come pass. Napodia na Iya Ibeji first pikin. My people, una for come see yansh na!

See yansh!

Make I talk am again: yanshhh!

E possible say d yansh size increase because of d shepe wey dey my body dat evening sha. I no sure. Napodia fit tall pass me small. She no black but she no yellow. Her face no too fine but I no dey chop face.

“Heyss! Come here!” My voice sef come strooong. Napodia turn look me. I don dey notice d babe before but she no dey fine for my eye. But as she look me dat day, I look am back. Omo, d babe no too bad sha. Shepe get power o.

“Na wetin?!” she nearly dey shout sef. Idiot. She know who I be?

“I say come here my friend! You know why I dey call you?” she carry tray but notin dey inside. E be like say she been dey help her mama do sontin but I no send. She begin waka dey come.

“Oya. Na wetin make you dey call me?”

“I call you because I have one question for you,” Jolomi take style teach me English sha. And I don hiiiiigh…

“Wetin be d question,” Mumu sef dey squeeze face for me. Dis Napodia deserve slap. In fact, all d girls for dis area deserve slap!

“My question is: why your yansh big like dis?” As I dey ask, my hand don fly go her back go slap d yansh small. She no dey fear?

“Common, remove ya hand. Common!” She dey slap my hand but she dey laugh small join.

“Why won’t I slap d yansh? You sef no see as e big. If to say you be me, you no go slap d yansh?” D yeye babe begin laugh more. I know say maga don fall. Idiot…

***************************************************************************

“I no go huzzle (till infinity) but I go bubble (till infinity)…”

I pick d phone. Wizboyy na still my man. I never buy jeep and Showkey never serious yet.

“Hello, guy how far na?” Na my guy Kajeta been dey call. Again.

“Guuuuy! Yawa don gaaassssss o!”

“Ahn ahn. Wetin happen again?”

“Napodia don get belle!”

“Napo-wetin?”

All dis Orile winches no go kill me!

%d bloggers like this: